اللوحة للفنان محسن شعلان
ناقص واحد
كام كلمة وكنت بقولها زمان
لما ازعل
أو حد يسيبني
عن إني لوحدي ومش زعلان
عن إن ماحدش يحاسبني
عن كام حدوتة انا مش فاكر
وماحدش يعرفهم غيري
أنا عمري ما قلت انا مش غلطان
وكتير بتأسّف لضميري
وبعيّط لمّا بكون زعلان
وانا داخل بُكرا على التلاتين
بطّلت سجاير كام مرّة
ومش قادر ابطّل أعِد سنين
جرّبت أعيش وحسام ميّت
من غير أسباب
جرّبت أعيش ناقص واحد
من ضمن صحاب
أنا لسة صغيّر
أنا عارف
مش عايز أكبر
أنا خايف
وكتير بستتقل دم الناس إكمنّي لوحدي ومش شايف
أنا أوّل مرة أبوس واتباس
كان درس خصوصي في بيت رائف
وفاكرها وهي بتضحكلي
وبتقول لمّا اكبر نتجوّز
وكبرنا أهو وماتجوّزناش
كام واحد قاللي ماتخنقناش
لمّا ابدأ اقولّه ان انا زعلان
واسمعهم لمّا بيتدايقوا
كام واحد صاحبي ومش طايقُه
علشان أسباب مش في دماغي
أنا كنت بعاكس وبلاغي
ودلوقت كبير
أنا عندي كلام عايز اقوله
تصبحوها على خير
……………………………………………….
تنظير
كتبت كتير عن الوحدة وع الأصحاب
عن البنت اللي حبّيتها بدون أسباب
وعن خيانتها للعِشرة
وموتها فـ قلبي من فترة
كتبت كتير عن الثورة
عن الإنسان
عن البني آدم الطيّب
وع الأخوان
عن المسافات بين الأحباب
وحب الأوليا لله
وعشق الصالحين للناس
وحب الطامعين للجاه
وموت الغائبين لينا
وكونهم حاضرين فينا
وإن قلوبنا في إيدينا
تروح للي العيون عاشقاه
بعيد عن إنّ مين قايل
ومين هزّر
ومين نظّر
خلاصة كل شيء مكتوب
بداية القصة مش منظر
وآخر القصة مش محسوب
من ديوان نظر 2015
اقرأ أيضًا:
ضل الحيطة..قصة لـ تغريد النجار
مقهى لا يعرفه أحد..قصيدة لـ زيزي شوشة
ماء البارحة..قصائد لـ مروان علي
حفرة للعب..قصيدة لـ مها شهاب الدين
سحر الغواية..قصيدة لـ رحاب زيد
مندرة العائلة..قصائد لـ فتحي عبدالسميع
أغلقي الباب ونامي..قصيدة لـ كمال عبدالحميد
مختارات من قصائد قاطع طريق.. لـ سيد العديسى
